Наше Кредо Репортаж Vox populi Форум Сотрудничество Подписка
Сюжеты
Анонсы
Календарь
Библиотека
Портрет
Комментарий дня
Мнение
Мониторинг СМИ
Мысли
Сетевой навигатор
Библиография
English version
Українська версiя



Лента новостей
БиблиотекаАрхив публикаций ]
Распечатать

Служба святому праведному Феодору Андрееву, пресвитеру Петроградскому, исповеднику. [богослужение]


мая в 10-й день

Творение Амвросия епископа.

 

НА ВЕЛИЦЕЙ ВЕЧЕРНИ

Блажен муж, 1-й антифон.

На Господи, воззвах стихиры святаго на 8, глас 8-й.

Подобен: О, преславнаго чудесе:

Приидите, вернии от остатка мала,* отца нашего духовнаго похвалим,* великаго песньми почтим* ангела земнаго и гражданина небеснаго,* Феодора досточуднаго,* звезду многосветлую,* исповедника Христова преславнаго.

Приидите, веры истинныя ревнителие и взыграйте,* в песнех прославим духовных,* увязем венцы похвальными* рая Едемскаго солнце пресветлое,* цвет присноживотный и богопрозябенный* Феодора присноблаженнаго,* правило веры благочестивыя* и образ чистаго исповедания.

Приидите, истины взыскующии,* да услышим трубы богогласныя,* цветы богомудрыя,* како ныне вещают глаголы златоустыя,* светила духовныя,* на тверди церковней возсиявшыя,* Феодор исповедник праведный* и Михаил мученик преславный.

Приидите мучениколюбцы вернии,* да узрим Симона Киринейска подражателей* и трубою песней вострубим* Феодора, исповедника праведна* и Михаила, мученика преславна* святителем Иосифу Петроградскому и Димитрию Гдовскому,* на Голгофу нову грядущым,* крест несущих.

Приидите, чада вернии Церкви Филадельфийския,* песненными добротами восхвалим,* великаго в посте стоятеля воспоим,* добраго в пастырех благочестия поборника,* безумства Сергиева обличившаго,* ересь сего посрамльшаго* и нас во правоверии укрепляюща.

Приидите, архиерее и священницы,* старцы и юнии,* светло днесь взыграйте:* песньми священными воспоим православия рачителя,* благочестия светлое украшение,* пролитие дарований духовных,* Сергиевы лести попалителя,* Феодора огневещаннаго,* егоже молитвами спасаемся.

Приидите днесь, великаго града Петра жителие,* ко гробнице угодника Христова Феодора,* пастыря добраго, приникше,* духовный составим лик,* песньми священными воспоим* града нашего сокровище,* благочестия правило,* душевное благородие,* ума чистоту,* мудростию истины сияющаго.

Приди и ты, небесный предстателю наш к чадом твоим,* требующым милостиваго твоего посещения,* помыслы благочестия сердца наша просвети* и во правоверии утверди,* блаженне Феодоре,* ходатай буди за град въ немже подвизался еси,* научи ны дерзновенно истину исповедати* и страха вражия не боятися.

Слава, глас тойже:

Приидите воспоим благодарственную песнь Христу Богу,* се бо дарова нам благочестия столп,* нечестия противоборца,* злославныя посрамляюща,* Церкви великаго заступника же и учителя,* Феодора боговещаннаго,* имже избавлени лести бесовския,* возревнуем ревности его, Спасу взывающе:* молитвами его, Боже,* царствия причастники ны сотвори.

И ныне: праздника.

Вход. Прокимен дне и чтения.

Пророчества Исаиина чтение.

Послан бысть ко мне един от серафимов, и в руце своей имяше угль горящ, егоже клещами взят от олтаря, И прикоснуся устнам моим, и рече: се прикоснуся сие устнам твоим, и отымет беззакония твоя, и грехи твоя очистит. И слышах глас Господа глаголюща: кого послю и кто пойдет к людем сим? и рекох: се аз есмь, посли мя. И рече: иди и рцы людем сим: слухом услышите, и не уразумеете: и видяще, узрите, и не увидите: одебеле бо сердце людей сих, и ушима своима тяжко слышаша, и очи свои смежиша: да не когда узрят очима, и ушима услышат, и сердцем уразумеют, и обратятся и исцелю я. И рекох: доколе Господи? и рече: дондеже опустеют гради, от еже ненаселеным быти, и домы, от еже не быти человеком, и земля останется пуста. И посем продолжит Бог человеки, и умножатся оставльшиися на земли. И еще на ней есть десятина, и паки будет в расхищение якоже теревинф и яко желудь, егда испадет из плюски своея: семя свято стояние его.

Премудрости Соломони чтение: Праведник аще постигнет скончатися:

Премудрости Соломони чтение: Праведницы во веки живут:

На литии стихира храма. И стихира святаго, глас 3-й:

Яже за истину изгнание* и темничное заключение,* гладом и жаждею томление,* богоборцев же хулы и клеветы* огня божественного исповедания твоего* угасити не возмогоша,* Духа же Святаго благодатию осиянный,* мечом евангельских глагол* огнедышащую змиеву главу* Сергия безумнаго посрамил еси,* пламень же ересей того угасил еси:* темже молися о нас, Феодоре прехвальне,* стезями твоими благочестно ходити нам,* да во гласе последния трубы* добрыми во правоверии украшени явимся,* славяще Христа, единаго Господа.

Слава, глас 8-й:

Придите, возрадуемся Господеви,* воскликнем Богу, Спасителю нашему:* дарова бо нам учителя великаго,* в правоверии стоятеля,* истины поборника, ересей чуждаго,* Церкви же святой приснаго Феодора,* исповедника светло блистающа,* верным же сопутствующа* даже до врат вечнаго обетования.

И ныне, Богородичен, глас тойже:

Придите, людие, купно составльше лик,* возопиим Державней Владычице:* не презри ны окаянныя,* Ходатаице наша неусыпная,* потщися на умоление,* утверди в нас державу Твою и спаси ны,* не имамы бо добрых дел,* но ради правоверия спастися нам* молим Тя купно со отцем нашим Феодором,* Богоблагодатная.

На стиховне стихиры, глас 5-й:

Радуйся двоице священная,* светом веры правыя нас озарившая:* Феодоре, духовныя мудрости источниче живоносный,* жаждою истины истаявающыя напоивый,* Михаиле, богословия трубо златокованная,* злохульная уста Сергиева заградивый,* не престайте молящеся о нас Христу Богу,* верою и любовию вас величающих.

Стих: Благовестих правду в церкви велицей,* истину Твою и спасение Твое рех.

Радуйся, Христовы Церкви пчело,* Феодоре достоблаженне,* жалом божественныя ревности вооружився,* богомерзкия новыя ереси хулы уязвил еси* и душам верных благочестия сладость сокровиществовал еси,* и ныне небесного рая проходя пажити нетленныя,* молися о нас Христу Богу,* верою и любовию тя величающих.

Стих: Священницы Твои облекутся в правду,* и преподобнии Твои возрадуются.

Радуйся, избавльший душу твою* от уст лживых и языка лукаваго,* крилами богоразумия восперивше ум,* истину верным возвестил еси,* уста же льстиваго и язык его велеречивый обличил еси:* темже чада твоя от злых сохрани* и молися о нас Христу Богу,* верою и любовию тя величающих.

Слава, глас тойже:

Радуйся, церкве лукавнующих посрамление* и Церкве Христовы украшение,* ты бо не текл еси на совет нечестивых* и на седалище губителей не сел еси,* Феодоре, исповедников сопричастниче,* буди и нам в истине велие утверждение* и на еретики изрядное одоление* и молися о нас Христу Богу,* верою и любовию тя величающих.

И ныне: праздника.

Тропарь, глас 2-й:

Отче священниче Феодоре,* мал был еси во братии твоей,* обаче пастырем пастыря постави тя* ученьми твоими Христос Бог,* Егоже моли с мучеником Михаилом* показати благая гонимей Церкви Своей* и даровати душам нашим велию милость.

НА УТРЕНИ

На Бог Господь: Тропарь праздника, дважды.

Слава: Тропарь святаго.

И ныне: праздника.

По 1-й кафисме седален, глас 2-й:

Воистину яко река благодати* и Духа Святаго источник неисчерпаемый,* посреде пустыни еретическия явился еси* и истины жаждущыя напоил еси,* духоточне отче Феодоре,* излей и на ны влагообилие ныне учений твоих,* да процветет град опустошенный. (Дважды)

Слава, и ныне, праздника.

По 2-й кафисме седален, глас 7-й:

Не остави нас, святе Феодоре, не остави,* да зряще ревность о правой вере твою* и лепоту исповедания твоего,* и добродетельному житию дивящеся,* внимаим словесем и наказанием твоим,* благодатию напитаимся:* аще и тесними и умалени есмы,* восхвалим и поем Державу Зиждителя,* яко свята есть. (Дважды)

Слава, и ныне: праздника.

Полиелей и величание:

Ублажаем тя, святе праведне отче Феодоре, ересь лукавую обличившаго, истиною нас озарившаго и образ спасения показавшаго.

Псалом избранный:

Возненавидех церковь лукавнующих и с нечестивыми не сяду.* Благовестих правду в Церкви велицей: истину и спасение Твое рех.* Яко сохраних пути Господни, и не нечествовах от Бога моего.* Блажени живущии в дому Твоем, во веки веков восхвалят Тя.

По полиелеи седален, глас 4-й:

Отверзи уста наша, Спасе,* даждь слово разума рабом неключимым* воспети достойно Феодора, пастыря праведного,* отступником противоборца,* лукавнующих посрамителя,* православия ревнителя,* Церкви Твоея украшение,* лепоту исповедания,* благочестно и свято житие совершивша* и богоугодно нас жити учаща,* да рая красного наследие восприимем.

Слава и ныне, Богородичен, глас тойже:

Неправда, яко море, покры землю Твою,* и ныне люте потопляеми есмы,* и мало есть разумевающих,* но Ты простри десницу Твою,* и яко Всехвальная,* постави ны на камене веры правыя,* и спаси ны, Владычице, спаси ны,* и утверди посреде нас державу Твою.

Степенна, 1-й антифон 4-го гласа.

Прокимен, глас 4-й: Честна пред Господем смерть преподобных Его.

Стих: Что воздам Господеви о всех, яже воздаде ми;

Всякое дыхание да хвалит Господа:

Евангелие от Луки, зачало 64-е.

По 50-м псалме:

Слава: Молитвами святаго отца нашего Феодора:

И ныне: Молитвами Богородицы:

Стихира, глас 2-й:

Приидите, вернии,* не от теплохладных, но во истине стоящии,* притеснения и скорби за веру терпящии,* духовный составим лик,* песненными цветы венчаим* правыя веры учителя и ревнителя,* пастыря нашего Феодора исповедника,* той бо воистину вся блаженства Господня пройде:* обнищав бо духом, обогатися:* кроток быв, землю кротких наследова:* плакася зде и тамо утешися:* взалка правды и насытися:* миловав, помилован бысть:* чист быв сердцем, Бога яко мощно узре:* миротворец быв, божественнаго сподобися сыноположения:* гонимь быв правды ради и благочестия,* на небесех ныне веселится и радуется,* моляся о гонимей Церкви Российстей* и страждущих чадех Ея истинных,* чающих Христова утешения.

Канон праздника со ирмосом на 6.
И святаго канон на 8, егоже краестрочие:

Амвросия убогаго песнь приими, Феодоре.

Канон, глас 8-й.

Песнь 1-я.

Ирмос: Поем Господеви,* проведшему люди своя сквозе чермное море,* яко един славно прославися.

Ангела земнаго нам даровавшему поем Господеви, в день празднственный памяти исповедника Его, яко един славно прославися.

Молитвы отца нашего Феодора, за ны возносимыя ко престолу Твоему, приими, Многомилостиве Владыко, славно бо еси прославился.

Возбнув от неистовства греховнаго, бежим лести Сергиевы, братие, последуим отцу нашему Феодору, и прославим во истине Христа Бога, славно бо прославися.

Богородичен: Радосте верных, не остави ны, Владычице, молитвами отца нашего Феодора, да от Тебе рожденному во хвалении поем: славно бо прославися.

Катавасия по уставу.

Песнь 3-я.

Ирмос: Ты еси утверждение притекающим к Тебе, Господи,* Ты еси свет омраченных,* и поет Тя дух мой.

Обручение Духа достойно сохранив, и возраст Божий от юности в сердце соблюд, ныне на небесех в веселии Христу предстоиши: Тому предстати непостыдно и нам споспешествуй, славне отче Феодоре.

Словом Божиим старцы и юныя, простецы и ученыя напитал еси Феодоре, и ныне у престола Слова предстоя, вразумляй чада твоя пищи духовныя жаждати и идоложертвеннаго отвращатися.

Иисуса моли Сладчайшаго, отче Феодоре, да избавит ны от коварства духов лукавых и изведет из глубины греховныя, и отистит нас от беззаконий наших, и спасет души наша.

Богородичен: Яви ны сыны света, Владычице, молитвами отца нашего Феодора, пробави нам древния милости Твоя, бывшия от века верным, Пречистая.

Кондак и икос праздника.

Седален святаго, глас 7-й:

Нощь несветла ныне наста, бедствуем люте, огусте тьма греховныя, уже и христианы от Бога отступиша, правоверию измениша, древнее православие ересем уравниша, сон лености и нерадения зеницы наша смежи, но ты, отче святый Феодоре, лучу пресветлый Солнца Правды Христа, помраченную душу мою божественными твоими молитвами осияй, богоблаженне.

Слава и ныне, праздника.

Песнь 4-я.

Ирмос: Услышах, Господи,* смотрения Твоего таинство,* разумех дела Твоя* и прославих Твое Божество.

Учение Божие от младенства возлюбив, и даже до конца жития в верности истине пребыв, столп огнеподобен правоверия явился еси, Феодоре богоблаженне отче наш.

Божия мудрости возжелев, мирская учения яко тленная и скоропреходящая оставль, направил еси стопы своя нетленных учений сокровеществовати, и крепостию духовною вооружся, плотское мудрование повинул еси духу, Феодоре отче наш.

Обогатився премудростию Божией, юным возвестил еси ю во училище благочестия, любомудрием и художеством упасая я, да от устен твоих приемше благодать, людем принесут, учаще словесные овцы веровати в Троицу Единосущную.

Богородичен: Граде Небесный, верных Стено нерушимая, порази иже всуе враждующия на ны, державною силою Сына и Бога Твоего, Владычице мира Пренепорочная.

Песнь 5-я.

Ирмос: Просвети нас повелении Твоими, Господи,* и мышцею Твоею высокою,* Твой мир подаждь нам, Человеколюбче.

Ангельским спребывая ликостоянием, благодать священства восприем, жительству безплотных поревновал еси, светлостию чистаго жития твоего на небо добродетелей восшед высоких, жаждущия благодатию напоил еси, светом богопознания озарив, Феодоре, пастырю Христов прехвальне.

Господень служитель и человек Божий, свет веры одушевленный явился еси, егда возлияся благодать во устех твоих, обличити обновленцы и живоцерковники, и злочестие тех огненными словесы попалилил еси: тии же возбесишася и изгнаша тя из градскаго храма Девы, Феодоре, исповедников сопричастниче.

Отца нашего преподобнаго Сергия храм приюти тя, изгнанника правды ради, и ту возлияся благодать во устех твоих обильна, и потекоша к тебе людие града Петрова, держащеся за ризы твоя, богодохновенными учении и ревностным житием наслаждающеся, Феодоре, виноградарю Христов непостыдный.

Богородичен: Простри, Владычице, светоносную руку Твою, молим Тя со отцем нашим Феодором, и оживет вертоград Твой поникший, и нищии обрящут хлеб, и убозии ризы своя, яко воистину неизреченна есть милость Твоя.

Песнь 6-я.

Ирмос: Ризу ми подаждь светлу,* одеяйся светом, яко ризою,* Многомилостиве Христе Боже наш.

Егда пришел еси во храм Воскресения, блаженне Феодоре, возрадовашася на небеси ангели, на земли же человецы, града Петрова благовернии людие, видяще тя правды ради изгнанника, веры правыя исповедника тверда, истины Божия проповедника златоустаго, жития во Христе непорочную лепоту.

Серафими и херувими на небесех удивишася, како излияся благодать приизобильно во устах ваших, Феодоре блаженне и Михаиле славне, учителие богомудрии, егда лукавое суесловие еретическое буйствующаго Сергия златоглаголиво посрамисте, возтязующим ответ давше, от нечестия же отошедших оправдавше.

Ныне ополчися на ны нечестивое соборище сергианское, со властители мирскими вкупе, и вменихомся яко овцы заколения, уничижение и поношение носяще: но ты, отче Феодоре, от Бога нам дарованный, защити верных малое стадо, и избави от попрания останок истинный.

Богородичен: Пререкание злославных и мрак люте истязуют землю Твою, уязвихомся от змия людие Твои, и яко из адова чрева вопием Ти, Благодатная: не нам, Дево, не нам, но ради молитв заступников наших, Феодора исповедника и Михаила мученика, светильников исповедания пресветлых, спаси, Владычице, всех верных останок малый Церкви православныя.

Кондак, глас 3-й:

Священную двоицу ревнителей истины достойно почтим,* отступление лукавых обличивших,* лжеучение волка новаго поправших,* двор же овчий от сего защитивших:* воспоим отца нашего Феодора исповедника* и Михаила мученика,* даже до днесь сокровище правоверия почерпающе* от златовещанных их глаголов,* сии бо престолу Вышнего предстояще,* молят об останце малом Церкви истинныя.

Икос:

Древеса доброплодная и красная* явишася святии учителие наши,* Феодор, пастырь богодарованный,* и Михаил златоглаголивый,* православных догматов хранителие* и канонов отеческих блюстителие,* от нихже души наша питаются* и глад наш духовный утоляется.* Приидите, вернии от останка мала,* песньми взыграим, глаголюще им с любовию:* радуйтеся, велиции наши учителие,* яко огнем богодухновенных вещаний ваших* лукавствие Сергия суемудрое попалися* и зломудрование клевретов его посрамися.* Мы же в гонениях лютых предстательствы вашими укрепляеми,* под сению вашею духовною пребывающе,* молитвеницы наши изряднии,* к заступлению вашему прибегающе,* упования дерзновенного не оставим:* предстоянием вашим у престола ыладычнего,* да приумножит Царь мира* в Церкви Филадельфийстей благодать Свою.

Песнь 7-я.

Ирмос: Божия снисхождения* огнь устыдеся в Вавилоне иногда,* сего ради отроцы в пещи радованною ногою,* яко во цветнице ликующе пояху:* благословен еси, Боже отец наших.

Рана есть нечестивому обличение беззаконий его, сего ради Сергий возбесився приказа отрешити тя службы Божия, обаче не кривовера, но отец древних послушав, Феодоре правоверне, радостно взываше: благословен еси, Боже отец наших.

Иосифу, архипастырю Петроградскому, и Димитрию, святителю Гдовскому, ревнителем истины богобоязненным, опора был еси, Феодоре, вкупе с Михаилом мудрым, нечестивыя обличая, правоверныя от ереси ограждая, взыскующия в вере нелестной утверждая, и поя Владыце правды: благословен еси, Боже отец наших.

Имя Божие прославляя, яко имя Его сам Бог есть, глаголал еси, вкупе со Иосифом святителем, Михаилом мучеником и иными мноземи святители, пастыри и мирскими исповедники, сице взывая: благословен еси, Боже отец наших.

Богородичен: Многия скорби на ны нашедшия виждь, Владычице, яко огнь палящь прииде на Церковь Твою и объят ю, но со блаженным Феодором вопием Ти: яко Купина Неопалима, скорбь нашу угаси, да с радостию взывает останок малый: благословен еси, Боже отец наших.

Песнь 8-я.

Ирмос: Мусикийским органом согласующим,* и людем безчисленным покланяющимся образу в Деире,* трие отроцы не повинувшеся,* Господа воспеваху* и славословляху во вся веки.

Истину ти вещающему, демони лукавии терпети не можаху, сего ради власть, тем служащая, поглумися ти и в темницу мрачну и люту заточи, но ты, отче, духом взыграв, песнопоя взываше: Господа пойте и славословите во вся веки.

Феодоре славне, богопроповедниче, яко Божий дар верным был еси, мучителей ярость пред тобою изнеможе и всяко ухищрение злобы истощися, яко стрелы младенец сломися, и отверзе ти двери темницы власть безбожная, да поют чада твоя ликующе: Господа пойте дела и славословите Его во вся веки.

Елико испыта тя Господь скорбми многими, толико приумножи на тебе благодать и дары Своя, и потекоша к тебе потоцы людския почерпати я, и учаше чада твоя смиренно глаголати в сердце своем: Господи, Иисусе Христе, Сыне Божий, помилуй мя грешнаго, и взывати сице: Господа пойте и славословите во вся веки.

Богородичен: Оживи вертоград Твой, Владычице, яко гневнаго ради Божия посещения, вера Христова в земли нашей поругаема есть ныне, теплохладностию и нечестивым сергианским зловерием: но величия ради благости Твоея и неизреченных щедрот Твоих, малодушныя во истине укрепи и верных останок умножи, да ликовствующе вкупе, Господа поим и славословим Его во вся веки.

Песнь 9-я.

Ирмос: Чуждо матерем девство,* и странно девам деторождение:* на Тебе, Богородице, обоя устроишася.* Тем Тя вся племена земная* непрестанно величаем.

Дом Отчий отверзе ти двери, егда преставился еси от земных, отче Феодоре, обаче ведуще тя и по смерти нам спребывающа, и молитвами твоими присно нас от ересей покрывающа, благодарно тя величаем.

Объятии радостию вернии града Петрова, пение велие духовно возносят в памяти твоей, отче Феодоре, лукавые же отступницы сергианстии всуе зубы скрежещут, яко и поныне притекающии ко гробу твоему в Невстей обители, во правоверии укрепляющеся, тя величают.

Рукама человечима святыни не покушаеми, но пребывают в долготу дний, темже аще и осквернен бысть безбожники храм Воскресения Христова, аще же и служение еретиков сергиан зде бывает, но не сему внемлет Бог: ангельское бо пение ту слышится, и духом пребываеши с верными, отче Феодоре, иже притекающе ко храма стенам, тя, исповедниче, величают.

Богородичен: Едину Заступницу усердную восхвалим, и честному Ея мысленно поклонимся образу: Той бо и в пленении у отступник пребываяй, граду святаго Петра есть великое сокровище, исповедником же преславное богатство, яко прельщения Сергиева бегающе и церкве лукавнующих отступивше, Сына Твоего, Владычице, во правоверии величаем.

Светилен, глас 4-й:

В песнех светило правоверия восхвалим,* небеснаго предстателя нашего Феодора,* веры истинныя утверждение,* законов церковных исполнителя и учителя,* светильника сущим во тьме отчаяния явльшагося,* егоже аще и земля потаила есть,* но небо прият, яко друга Христова. (Дважды)

Слава, и ныне: праздника.

На хвалитех стихиры на 6, праздника 2. И святаго 4, глас 4-й.

Подобен: Дал еси знамение:

Дал еси, Христе Боже,* верным истине заступника преславна,* Феодора, пастыря преподобнаго,* благочестия ревнителя* и веры правыя проповедника,* исповедника великаго православия,* Максиму чудному, Феодору же Студийскому* и Марку Ефесскому единонравнаго,* егоже молитвами даруй малому стаду Твоему* утверждение и велию милость.

Дал еси, Христе Боже,* Церкви столпа непоколебимаго,* угодника Твоего Феодора,* пастыря преблаженнаго,* правоверия ревнителя,* нечестия посрамителя,* веры православныя утверждение,* крепкое истины забрало,* чистаго исповедания зерцало,* древним отцем подражателя,* ныне же тем сожителя,* егоже молитвами даруй малому стаду Твоему* заступление и велию милость.

Дал еси, Милостиве Христе Боже,* Церкви православней воистину велие украшение,* лжецеркви лукавнующих посрамление,* на еретики и отступники изрядное одоление,* теплохладных и зломудренных огнепопаление,* истинным верным лучу златозарную,* Феодора светосияннаго,* егоже молитвами даруй малому стаду Твоему* утверждение и велию милость.

Дал еси, Милостиве Христе Боже,* истины востязующим органы богогласныя,* благих ходатаи и лестных отгонители,* Феодора исповедника и Михаила мученика,* духовныя мудрости источники присноживотныя,* от нихже неоскудно почерпающе,* злочестия Сергиева ограждаемся,* и медом боговедения напояемся, взывающе:* молитвами новомученик даруй малому стаду Твоему* заступление и велию милость.

Слава, глас 6-й:

Приидите днесь, града Петрова вернии* малаго стада Пастыря Добраго,* Христа Бога нашего,* псаломски восплещим руками,* вострубим трубою песней,* к честному гробу отца нашего Феодора припадем,* к Живоносному Кресту зде стоящу устнами приникнем,* раздоры и распри отвергше,* едину бо веру имамы,* и от сердца единогласно возопиим:* учителю и наставниче наш,* единомыслие в нас утверди* и о единении нашем молися,* даровати нам мир и велию милость.

И ныне: праздника.

НА ЛИТУРГИИ

Блаженны на 8, от канона праздника песнь рядовая, и святаго песнь 3-я.

Апостол, евангелие и причастен исповеднику.

Пожалуйста, поддержите "Портал-Credo.Ru"!


[ Вернуться к списку ]


Заявление Московской Хельсинкской группы и "Портала-Credo.Ru"









 © Портал-Credo.ru 2002-19 Рейтинг@Mail.ru  Rambler's Top100  Яндекс цитирования