Наше Кредо Репортаж Vox populi Форум Сотрудничество Подписка
Сюжеты
Анонсы
Календарь
Библиотека
Портрет
Комментарий дня
Мнение
Мониторинг СМИ
Мысли
Сетевой навигатор
Библиография
English version
Українська версiя



Лента новостей
БиблиотекаАрхив публикаций ]
Распечатать

Канон всем святым, в земли Вританнийстей просиявшим (Память в Неделю 3-ю по Пятидесятнице) [богослужебные тексты]


Песнь 1.

Ирмос: Песнь возслем людие чудному Богу нашему, свободившему Израиля от работы, песнь победную поюще и вопиюще: поем Тебе единому Владыце.

О, святии апостоли, делатели веры возрастшии в земли Вританнийстей, радуйтеся, яко кровь мучений ваших явися семя родов христианских. Не престайте призирати на чад ваших, молим вы.

Не убоялся еси мучителевых угроз, биемый и ураняемый Христа ради, о святый первомучениче Албане; со Иулием и Аароном и всеми мученики Вританнийскими моли непрестанно о душах наших.

О, блаженне священномучениче Христов Авгуле, со дружиною твоею честною, не забуди отечества твоего: от глада и ига греховного сие избави, и вся надеющияся на тя от междуусобныя брани и всякаго зла исхити.

Святым Мартином наказанный, подражал еси тому, землю шотландскую просвещая, о святый святителю Ниниане; первый в честь сего храм от камене в земли Вританнийския во граде Виторне возвел еси, добродетельми сияя.

Иже разбойники морскими во Ирландию похищен в юности своей, возвратился еси яко апостол блаженный, о Патриче, плоде благославный Вританнийския Церкве: моли Бога о чтущих тя, получити им велию милость.

Богородичен: Радуйся, пресвятый храме, руно Богоносное, запечатленный источниче, безсмертия струе. Стадо Твое, Владычице, сохрани от всех борющих невоевано.

Песнь 3.

Ирмос: Несть свят яко Господь и несть праведен яко Бог наш, Его же поет вся тварь: несть праведен паче Тебе Господи.

В человецех сеял еси слово, о святый иерарше Германе, обильную жатву принося Христу; со сподвижники своими, Кононом и Мавголдом святители, моли Бога о чтущих тя, получити им велию милость.

Списатель был еси деяний святых мученик и обличитель грехов людей твоих, о Гильде Премудре: якоже во обители Гластонбурийстей живя, покаяние проповедал еси, тако и ныне моли исцеление нам получити грехов наших.

Княжеск дом отца своего оставив, взыскал еси пустыннаго жития в земле Девонстей, о Нектане, святый мучениче Христов: со святыми братиями и сестры твоими во славе со Христом ныне царствуеши.

Столп веры был еси, о Петроче, радосте церкве Корнския: с Константином царем, монахом же и мучеником, и со всеми святыми Корнваллийскими, моли о душах наших.

Земли запада обходя, удивил еси вся добродетельми твоими, о святе Сампсоне: исполнь Духа Святаго, духов злобы изгнал еси из сердец человечих: темже молися о всех почитающих тя.

Богородичен: Чистая — отроча рождаеши, Дева — млеком доиши. Како вкупе обоя действуеши, рождши? Бог есть содеявый, не изыщи мене, еже како.

Кондак, глас 3: Днесь лик святых в земли Вретаннийской угодивших Богу предстоит в церкви и невидимо за ны молится Богу; Ангели с ними славословят и вси святии Церкве Христовы ему спразднуют: о нас бо молят вси купно Превечного Бога.

Песнь 4.

Ирмос: Из горы приосененныя Слове пророк, единыя Богородицы, хотяща воплотитися Боговидно усмотри, и со страхом славословяше силу Твою.

Сонм монашествующих ты собрал еси, о Давиде, славне архипастырю Меневийский, и глас возвысив на высоту, пелагиевых ученик ярящихся молчати сотворил еси: со святыми иерархи Дюфригом и Дейниолом моли и нам избавитися от всякия ереси.

От Ирландския страны пришед, о голубе затвора, славнейший Колумбо, всю землю шотландскую просветил еси чудесы твоими, по кончине же своей святому Освальду Английскому явился еси, предрекая на враги победу: со другом твоим Кентигерном святителем молися о душах наших.

О святии князие, мученицы, монаси и иерархи Кельтския земли, вы пустыню западную град сотворили есте, житием же вашим наставляете нас, крест вземше на рамена своя, Христу вослед идти.

Радуйся, о Августине, великаго Григория многоценное чадо: радуйся, апостоле Англския земли: радуйся, первый Кантерберийския церкве предстоятелю и всех верных пред престолом Божиим предстателю.

Во всю землю изыде вещание ваше, идольския жертвы разоряя и веру истинную в сердца англов насаждая, о святии иерархи Кантерберийстии и Иоркстии Лаврентие, Мелите, Иусте, Онорие, Деусдедите (Феодоте) и Павлине.

Богородичен: Радуйся, Божие пространное вместилище, радуйся, ковчеже Новаго Завета. Радуйся, ручко, из неяже Манна Небесная дастся всем человеком.

Песнь 5.

Ирмос: Страстей мя мглы, яко от глубокия нощи избавляяй, утреневати сподоби дух мой молюся, во свете дне повелений Твоих, Христе.

Силою креста вооружився, победил еси враги Христовы, о святый царю Освальде, непрестанно моляся и милостыню творя, венец мученический достойно приял еси: со святыми цари-мученики Едвином и Освином молися о душах наших.

От благословеннаго острова Ионы пришел еси, о смиренне Айдане, и млеком учений твоих напитал еси сердца англов: со святыми земли Линдисфарнския моли разрешение нам получити грехов.

Жениха земнаго отвергла еси Небесного ради Жениха душ наших, о Еансвита, первая в женах монашествующих на Юзе явилася еси. Ныне убо со святыми братиями твоими Етелбертом и Етелбрихтом на небесех ликуеши.

От адския мрачныя бездны приял еси видения, и страхом веру в людех утверждал еси, о святый отче наш Фурсее: со святым игуменом Ботолфом и Феликсом, иерархом праведным, жизнь монашескую в востоцех земли англския возрастил еси.

От мертвых восставлен быв, о святый девственниче Винефриде, всем показал еси путь жизни: темже со святым Бевно и всеми святыми валлийскими не престай молити о душах наших.

Богородичен: Радуйся, миру славо, Богородице Марие Всепетая, радуйся главизно Божественного соединения Сына Божия к человеком Чистая.

Песнь 6.

Ирмос: Содержима мя, приими Человеколюбче, грехи многими, и припадающа щедротам Твоим, яко пророка Господи, и спаси мя.

В старости твоей благодатию Божиею укреплен, от Тарса пришел еси аки вторый Павел, о святый иерарше Феодоре: со святым Адрианом, спутьшественником твоим, православным христианом во единстве пребыти моли.

Еще и по кончине твоей святей нетленное тело твое чудеса исцелений точит верным, о славный Кутберте, зане был еси подвижник и верный пастырь твоему стаду, светильниче и предстателю земли западныя.

Яко столп огнен во блате воссияла если, о дево царственная Етелдреда, тело же твое доднесь нетленно пребывает: с преподобным Гуною и сестрами твоими Сексбургою, Витбургою и Ерменгилдою моли о всех нас.

О, святыя игумении Гильдо, Осита, Етелбурга и Вербурга, воздержание и смирение стяжавшия, премудрость, веру и любовь совершенну, царствия небеснаго достигосте.

Миротворец явился еси и мир преславный от Царя Мира стяжал еси, о Еркенвалде, граду Лондону велия похвало и святе иерарше: ты еси ходатай душ наших.

Богородичен: Из корене Иессея прорасте Цвет жизни, взыграй, прадеде, от Чистыя Отроковицы Христос Бог, спасаяй мир.

Песнь 7.

Ирмос: На поле Деире, иногда мучитель пещь постави на мучение богоносных: в нейже три отроцы песнословяху Единого Бога, троично воспеваху, глаголюще: отцев Боже, благословен еси.

Слезы твои в пустыне возрастиша плод сторичный, о святый отче Гутлаче: демоны победил еси оружием молитв твоих, дар же с небеси приял еси целити недуги всех почитающих тя.

О святый Милдреде, от Галлии пришедый и твою печать утвердивый на Танетствем брезе, восприят был еси яко печать на сердце Небесным Царем, со святыми сестры твоими Милдбургою и Милдгитою моли о душах наших.

Словес лепотою украшен, преподобный отче Беде Ярровстий, явился еси божественный списатель: и якоже прославил еси Вританнийския святыя словом твоим, тако и Бог ныне прослави тя: со святыми отцы Венедиктом и Цеолфридом ходатай буди нам, грешным.

Поборая преславно за каноны святыя, тьму языческую Суссекса просветил еси, о Вилфриде; со святители Чадом и Цеддом, Егвином и Алдгелмом, Аккою и Алкмундом ныне почитаем тя верно.

К жителям страны Голландския, от многобожия засухи жаждою мучимым, воду жизни принесл еси, о премудре Виллиброрде-Клименте: и нам моли сладкое вино покаяния улучити.

Богородичен: Радуйся, Марие Богородице Дево. Радуйся, престоле Господень. Радуйся, лествице, яже человеческий род горе возведши от земли ко Христу Богу.

Песнь 8.

Ирмос: Победители мучителя и пламене, благодатию Твоею бывше, заповедем Твоим зело прилежаще, отроцы вопияху: благословите вся дела Господня Господа.

Храмы идольския разрушив, людей множества ко Христу привел еси, священномучениче Вонифатие, Германския страны просветителю. Темже со святым Еобаном и сонмом ученик твоих венца мученическаго сподобился еси.

Вопль сродник ваших, во тьме живущих, услышав, остависте вся и за море поидосте, о святии братие Виллибалде и Вунебалде и сестро ваша Валбурга: темже с божественными Леобою и Феклою на небесех радуетеся.

От Ирландския страны пришед, о святителю Фергюсе, благодать слова Божия скОтам принесл еси; со Дростаном, Филланом и Мелруббою преподобными жатву душ обильную собрал еси.

Багряницею кровей ваших украсившеся, вместо скиптра крест прияли есте, святии страстотерпцы Етелберте, Кнелме и Вистане, чудесы же от мощей ваших невинность вашу утвердисте.

Егда севернии свирепии людие приидоша на брега вританнийския, яко жертвы благоуханныя Христу принесостеся, о святии священномученицы Дариане и Сталбранде: с Блаитмаиком Ионским и всеми мученики, от варяг пострадавшими, молите о душах наших.

Богородичен: Ты горя Божия явися, Богородице, в нюже Христос вселися и Божественный храм содела поющим: Господа пойте и превозносите Его во веки.

Песнь 9.

Ирмос: О девства край Богородице, песньми же славными, праздники возвышающая благодатей Твоих, и ныне девственною слова Твоего памятью, наитием тайным украшающая в ней, Тя величающия.

В царственном Винчестере граде воссиял еси смирения благодатию, святителю Свитуне; темже Бог чудесами тя возвеличи, летам многим прешедшим по кончине твоей.

Подражатели апостолом явистеся в трудех и бдениих, ныне предстоите за люди и церковь, о святителие Алфеже и Одо; темже во псалмех и пениих вы ублажаем.

Силою креста ограждаема и божественною любовию укрепляема, о святая дево Едито, воздержания стрелами уязвила еси уязвльшего Еву: со святою прабабой своею Елвигою и девы святыми Вулфгилдою и Етелфледою моли о душах наших.

Молитву яко меч и щит взем, тьму языческую разорил еси, о Лиде, подвижниче островов Сциллийских, темже и мудростию твоею Олава царя Норвегии к вере правой привел еси.

О святии отцы и материе, именованнии и неименованнии, ведомии и неведомии, Иерусалима небеснаго достигшии и велию славу от Христа Бога получившии, молите Его, яко дерзновение стяжавшии, да возсияет паки в земнем отечестве вашем вера православная, чтущии же вас верно царствия вечнаго да сподобятся, Троицу Святую славяще во веки.

Богородичен: Радуйся, палато всех Царя, радуйся, яко Царствие Небесное Тобою отверзеся сущим на земли, Мати Дево, и еже со Ангелы селение.


[ Вернуться к списку ]


Заявление Московской Хельсинкской группы и "Портала-Credo.Ru"









 © Портал-Credo.ru 2002-19 Рейтинг@Mail.ru  Rambler's Top100  Яндекс цитирования